Ezkio-Itsaso Udala

 2010-02-20: Aro berri bat abesten

Astelehen iluntzea da. Inor ez da afaltzen ari Ezkio Itsasoko elkartean, baina argi guztiak piztuta daude barrualdean eta jende hots handia entzuten da. Jende hotsa bakarrik ez, baita zenbaitetan hainbat ahots ezti ere, piano baten laguntzaz abesten. Ezkio Itsasoko abesbatzaren entsegu eguna da. Hamazazpi lagunek osatzen dute guztira Ezkio Itsasoko abesbatza eta ia guztiak daude elkartean. Aulkietan eserita, zirkulu bat osatuz, partiturak eta abestien letrak dituzten paperak eskuetan hartuta. Xabier Barriolak isten du borobila, herriko organu-jole berriak, bere organu elektroniko txikia jarrita duen mahaia aurrean duela.
Abesbatzako partaideak ez dira musikan adituak eta ez dira aritu gaztetatik euren ahotsa ezagutzen eta zaintzen abeslari profesionalen moduan. Baina abestea gustuko dute eta euren ahotsen eztitasuna aurkitzen eta ateratzen ikasi dute. Orain hogeita bi urte elkartu ziren garai hartan herriko organu jole zen Juanito Idiakezen ekimenez, 1988an, eta ordutik ez dira isildu. «Orduan elizako abesbatza bezala hasi ginela esan daiteke, eta orain arte horrelaxe jarraitu dugu», azaldu du Maixabel Arakistainek, hasieratik abesbatzan parte hartzen aritu den herritarrak. Herriko elizetan abestu dute orain arte abesbatzako kideek. Mezetan, hiletetan, bataioetan, jaunartzeetan... Ondorioz, eliz kantuak ziren neurri handi batean abesten zituztenak.
Urte hasieran, baina, Errege egunean, aurreikusitako aldaketa gauzatu zen. 86 urterekin Juanito Idiakezek elizako organua jotzeari utzi zion, lan horretan hamarka urtetan aritu ostean, eta Xabier Barriola zumarragarrak hartu zion erreleboa, aurretik ia urtebete abesbatzaren zuzendari ordetzan eman ondoren.
«Mundiala da»
Urte askotako esperientzia du Barriolak abesbatzak zuzentzen. Tolosako Kea, Donostiako Conductus Ensemble, Iruñeako Kamera abesbatza edota Peñaflorida abesbatzak zuzendu ditu, eta orain ere horretan jarraitzen du. Prestigiodun talde handiak dira horiek ordea, Ezkio Itsasoko abesbatzaren aldean. «Egia da, baina ez naiz inora joaten Ezkio Itsasora etortzen naizen bezain gustura», aitortu du Barriolak. Gustuko du oso Ezkio Itsasoko abesbatza zuzentzea eta nabari zaio. Abesbatza txikia denez, hiru ahotsetara soilik abestu dezakete, eta hainbat abesti moldatu egiten ditu horretarako. «Tranpa egiten dut baina...» dio, irribarre txiki bat ateraz. Kantu erlijiosoak bakarrik ez, euskal kantuak ere lantzen hasi dira orain.
«Xabier mundiala da», diote aho batez abesbatzako kideek zuzendari berriaren inguruan galdetuta, irribarrea ahotik ezkutatu ezinik. Hitz ederrak besterik ez dituzte beretzat.Faltan botatzen dute Idiakez, hamaika urte eman baitituzte Ezkio Itsasoko abesbatzako kideek bere gidaritzapean abesten. Baina Barriola besoak parez pare zabalduta jaso dute eta pozez zoratzen daude orain.
Barriola iristearekin batera erronka berri bati heldu dio abesbatzak: elizatik plazarako saltoa eman nahi dute. «Elizan bakarrik ez, herriko beste hainbat ekimenetan ere parte hartu nahiko genuke aurrerantzean », aitortu dute Barriolak eta Arakistainek. Kultur Astearen baitan edota beste edozein egun berezitan herrian abesteko iniziatiba hartu dute. «Herriarentzat abesten jarraitu nahi dugu, beti ere», diote. Euren errepertorioa handitzen ari dira hori egin ahal izateko eta prest daude edozein egunetan elizatik kanpora emanaldiak eskaintzen hasteko.
Horretarako, baina, deialdi ireki bat ere egin dute: «Abesbatzako kide gehienak erretiratuta gaude jadanik, denok helduak gara. Gazteak nahi eta behar ditugu gure artean, abesbatzak etorkizunean ere bizirik jarraitu dezan, beste urte askoan». Hala, Ezkio Itsasoko nahiz inguruko herritar guztiei dei egin die abesbatzak. «Gazte nahiz heldu, gure artean edonor hartzeko prest gaude», adierazi dute kideek. «Guregana etorri besterik ez dute egin behar interesa dutenek. Entseguak 20:00etan izaten dira, Ezkio Itsasoko elkartean».