Ezkio-Itsaso Udala

 28-10-2009: Ezkio auzoko herrigunea urbanizatzeko lanak azaroan hasiko dituzte.

Ezkio-Itsaso ›› Auzoaren erdigunearekin batera plaza ere berrituko dute; 454.413,44 euroko aurrekontua dute lanek.
Ezkioko erdigunea urbanizatu egingo du Ezkio-Itsasoko Udalak, eta lanak azaroaren erdi aldera hasiko dituzte. Atzo egindako Osoko Bilkuran erabaki zuten obrak zein enpresak egingo dituen: Excavaciones Sasoi SL enpresak, hain zuzen. Bost hilabetean lanak bukatuta egotea aurreikusten dute, eta lanen aurrekontua 454.413,44 eurokoa da.
Ezkioko erdigunea urbanizatzeko lanekin batera bertako plaza ere berrituko dute. Urbanizatzeko gastuak (plazakoak izan ezik), arau subsidiarioak egin zirenean hirigintza aprobetxamendu berriak izan zituztenek ordainduko dituzte. Plazako berrikuntza lanen gastuak, berriz, Ezkio-Itsasoko Udalak ordainduko ditu.
Azpiegitura berriak
Lanak erdigunean azpiegitura berriak jartzeko edo daudenak berritzeko ere aprobetxatuko dituzte. Horrela, besteak beste, ur saneamendua, argiteria, ur hornidura eta telefoniaren kanalizazioa egingo dituzte. Gasifikazioari dagokionean atzoko Osoko Bilkuran Repsol enpresarekin hitzarmena sinatzea erabaki zen, Ezkioko erdiguneko gas hornidura enpresa horrekin egiteko helburuarekin.
Herriguneko gune bakoitzerako material desberdinak erabiliko dituzte. Ibilgailuentzako bideak asfaltatu egingo dituzte (3.089 metro koadro); plazan, elizara doan espaloian eta beste zenbait gunetan lauzak jarriko dituzte (715 metro koadro). Modu horretan bereiziko dituzte ibilgailuentzako eta oinezkoentzako guneak. Beste 290 metro koadrotan, berriz, galtzada- harri moduko materiala ipiniko dute. Lorategiek eta berdeguneek 1.268 metro hartuko dituzte.
Plaza berritzeko lauzak eta galtzada- harriak erabiltzeaz gain, bozadera eta iturria dauden lekuak txukunduko dituzte, eta banku berriak ere jarriko dituzte.
Ezkioko kaskoan beste zenbait lekutan ere jarriko dituzte hiri-altzari, banku eta zakarrontziak.