Ezkio-Itsaso Udala

 29-10-2009: Anduaga elkartearen beheko solairua berritzeko lanak bukatu dituzte jada

Eraikinaren aurrealdea ere itxuraldatu dute Udalak diruz lagunduta, eraikina herri jabetzakoa baita.
Ezkio-Itsasoko Santa Lutzi auzoan dagoen Anduaga elkartearen beheko solairua berritzeko lanak bukatutzat eman dituzte, baita eraikinaren aurrealdea eta kanpoaldea konpontzeko obrak ere. Etxaurrea eraberritzeko Ezkio- Itsasoko Udalaren diru laguntza jaso du Anduaga elkarteak, eraikina herri jabetzakoa baita.
Egun hauetan Mandubitik Izazpi barrenera bitartean dauden 62 ehiza postu zozkatzeko irekitzen dute Anduaga elkartea. Zozketak astelehenetik ostiralera egunero egiten dituzte, 20:00etatik 20:30era bitartean. Ostiralean larunbateko eta igandeko postuak zozkatzen dituzte eta igandean berriz, astelehenekoak. Jose Mari Zumarraga eta Luis Mari Torres bazkideek jakitera eman dutenez gainontzeko erabileretarako itxita dago oraindik elkartea, «detaile bat edo beste» falta delako. Baina ez denbora luzerako: bihar irekiko dute ofizialki Anduaga elkartea. Aurrerantzean bazkideek nahi dutenean erabili ahal izango dute.
Bazkide izan nahi duten herritarrentzako deia
Anduaga elkarteak gaur egun 62 bazkide ditu, eta gehienez 70 izan ditzake. Elkartean bazkide izan litezkeen kanpotarren kupoa %10ekoa da eta dagoeneko beteta dago. Horregatik, Zumarragak eta Torresek esan dutenez laster herritarrei deia egingo diete bazkidetza egitera animatzeko. 70eko kopurura iristea da helburua.
Anduaga elkartearen beheko solairua zein eraikinaren aurrealdea berritzeko obrak uztailaren 4an hasi zituzten. Zegama SL eraikuntza enpresak egin ditu obrak.
Orain arte elkarteak beheko solairuan, sarretatik berehala komuna eta tabernako barra zituen; elkarteko bazkideen arabera espazioa ez zegoen ondo antolatuta. «Festetan eta beste hainbat ekitalditan jendea elkartera gerturatutakoan ez zen barruraino sartzen. Komuna eta barra bertan zeudenez oztopo modukoa sortzen zen. Hori aldatu nahi genuen obra hauekin», aipatu du Luis Mari Torresek.
Espazioa berrantolatuta
Zeregin horrekin hasi zituzten lanak. Orain sartu eta ezkerraldera dago barra, baina ez da inolako oztoporik sortzen. Ondoren mahaiak eta aulkiak daude, eta bukaeran komuna eta biltegia. Komunetako batean dutxa jarri dute, eta ezgaitasun fisikoa duten pertsonentzako egokituta daude.
Elkartearen goiko solairuan ez dute aparteko aldaketarik egin, baina margotu eta txukundu egin dute.
Bazkideak gustura geratu dira obrekin, «helburuak bete dituztelakoan eta polita geratzeaz gain, elkartearen antolaketak aldaketa nabarmena egin duelakoan».
Barruko obraren aurrekontua 34.000 eurokoa izan da eta bazkideek ordainduko dute. Batzarrean mailegua eskatzea onartu zuten eta zati bat kredituarekin ordainduko dute.
Aurrealdea berritzea, aspaldiko asmoa
Eraikinaren aurrealdea berritzeko asmoa aurreko legegintzalditik zuen Ezkio-Itsasoko Udalak, eraikina herri jabetzakoa baita. Elkarteak herrian antolatzen dituen ekimenak direla-eta «herrian jartzen duen aletxoagatik» 36.000 euroko diru laguntza eman diete aurrealdea berritzeko.
Beheko partean, bi aldeetan eta goiko aldekon leiho inguruetan harria jarri dute, bistan. Gainerakoa margotu eta saneatu egin dute. Ez da hori, ordea, egin duten berrikuntza bakarra. Leiho guztiak aldatu dituzte. Kopuruan ez da aldaketarik izan, baina atzeko partean, beheko aldean lehen zituenak baino leiho txikiagoak baititu orain. Sarrerako ate berria ipini dute, eta eraikinaren beste puntan beste sarrera bat atera diote etxeari. Lehen ez zegoen leku horretan aterik, eta oraingoa biltokira kanpotik zuzenean sartzeko erabiliko dute.
Bigarren solairuan zegoen balkoia kendu egin diote eraikinari, garai batean eskola izandakoa, elkartekoen arabera ez baitzitzaion erabilerarik ematen.
›› DATUAK
62 bazkidekoa da Anduaga elkarteak gaur egun dituen bazkideen kopurua. Gehienez 70 izan ditzake. Bazkide izan litezkeen kanpotarren kopurua %10ekoa da, eta beteta dago dagoeneko kupo hori. Orain herritarrei egingo diete bazkide izateko deia; libre geratzen diren 8 tokiak bete nahi dituzte.