Ezkio-Itsaso Udala

Gi-2632 errepidean, Santa Lutzia auzoan dagoen bidegurutzean gora hartuta iritsiko gara bertara.
Herrigunea San Migel Goiaingeruaren parrokiaren inguruan elkartutako etxe gutxi batzuek osatzen dute.
Bisita-gai ditugun elementuen artean apaizetxe ondoko ur putzua eta harrizko gurutze bat daude.
Herrikoen bilgune nagusia Argindegi ostatua da.
Auzoko jai nagusia maiatzaren 8an, San Migel egunean, izaten da.

SAN MIGEL GOIAINGERUAREN PARROKIA

XVI. mendeko parrokia hau lehenagotik zegoen eliza gotiko baten hondarren gainean eraikia izan zen, eta eliza hartatik zortzi arkibolta edo kapitel jarraitu dituen arku zorrotzeko ataria dago oraindik ere.
Barrualdean garaiera bereko hiru nabe ditu, sekzio lau angeluarreko bi zutoin ilarak banatutakoak.
Dorrea oinaldean dago eta dorrearen beheko zatiak leiho gotiko zoragarri bat du, erdiko zutabe batek erdibitzen duelarik. Horrek adieraz lezake eliza berarekin batera eraiki zela. Dorrea osatzen duten gainaldeko bi gorputzak XVII. edo XVIII. mendean eraikiak dira. Ohiturak dioenez, kanpandorrearen kanpai hotsa Goierri guztitik entzuten da.

Dorrearen alboan, 3 arku apuntatu dituen aterpetxo bat dago, eta aterpetxoaren barruko aldean elizarako sarrera diren bi ate aurkitzen dira; bakoitza izkina batean, eta dorretik gertuen dagoena da lehenagoko eliza gotiko hartatik mantentzen den ataria.

Erretaula nagusia, Idiazabali XVI. mendean erosi zitzaion erretaula errenazentista da eta aipagarriak dira San Migelen irudia eta Germano mendiko agerraldien erliebeak.

Aurrealdean, beste bi aldare ere badaude, eta Arrosarioko Amaren eta San Juan Bataiatzailearen erretaula zoragarriak ikus daitezke.

APAIZETXE ONDOKO UR PUTZUA

EZKIOKO GURUTZEA

Ezkiok bi gurutzadura ditu, honako hau herrigunean Apaiztegi baserriaren ondoan dago.

Hareharriz egina, bi harmaila biribil eta oinarri karratu baten gainean eraikia. Oinarriak dituen lau aurpegietan erronbo horizontal bana ditu landuak

Fustea zilindrikoa da, 2,33 metrokoa eta azala ildaskatua du.

Kapitela korintoar motakoa da, akanto orriz apaindua. Gurutzea sekzio laukidunekoa da eta aurrealdean Jesus gurutzatuaren irudia dago, atzealdean Maria Birjina haurra besoetan duen irudia dagoelarik.

Gurutzaduraren altuera osoa 4,50 metrokoa da.